Full width home advertisement

Post Page Advertisement [Top]


"Dau, Nahwersch, hest dat all hürt?
Bi Diekelmanns is wat passiert!"

"Bi Diekelmanns - süh dat is recht!
Ick hev dat jo all ümmer seggt,
Mit Elli, de infamte Diern,
Da müßt dat einmal doch malürn!
Wenn man so denkt, de eitle Trien,
Kein richtig Hemd het ´s up de Lien,
Bloß Büstenhalters, sieden Strümp,
Un rosa Slüpfers, - so ein Schimv!
Un denn up jeden Bumms un Ball
Un Brüjams hier un oeverall!
Hihi! nu sitt sei in de Dint...
Von weckern hett sei denn dat Kind?"

"Dat Kind? - wieso? - wat snackst du denn?
Ih, Nahwersch, nee, wo denkst du hen?
Da hür mi doch irst richtig an,
Ick segg doch bloß, bi Diekelmanns..."

"De jungen meinst du sicherlich, - 
Oha, wer kennt den Lumich nich,
Den Rümmerdriewer un Spijon, -
Kreg hei mal endlich sinen Lohn?
An alle Dierns makt hei sich ran,
Doch olle Lüd kiekt hei nich an;
Meinst du vielleicht, hei grüßte mi?
Hei glubscht man bloß un grient dabi, - 
Dat is doch würklich rein tau dull!
Kregt hei dat Ledder nu mal vull?"

"Ih, Nahwersch, nee, so ein Gedroehn!
Ick segg doch gor nix von´n Soehn,
Ick mein doch bloß, bi Diekelmanns..." 

"Ach, bi de Ollen, kiek mal an!
Hem sei em endlich mal erwischt,
wenn he de Melk mit Water mischt,
Un dat Finanzamt hinnergeiht?
Dat schad em würklich keinen Deut!
Vörher ging de Schandarm vörbi.
Wo de woll hen will, dacht ick mi,
Nu weit ick dat, - süh, dat is recht!
Ick hev dat jo all ümmer seggt!"

Ih, Nahwersch, büst du denn nich klauk!
Wat redst du bloßen för Klamauk!
Wes still un holt de Luft mal an,
Dat ick min Wurt vullenden kann:
Bi Diekelmann - hest noch nich hürt? -
Is oewer Nacht de Kauh krepiert!"

(veröffentlicht v. M. Müller-Grählert im "Blinkfüer - Monatsblatt för Huus un Heimat" im September 1929,
 Postkarte: A. B. Kauffmann Nachf., Inh. Karl Bitterling, Göhren a. Rügen)

Keine Kommentare:

Kommentar veröffentlichen

Bottom Ad [Post Page]